sf_hebmodern - Genesis:1

sf_hebmodern@Genesis:1:1 @ בראשית ברא אלהים את השמים ואת הארץ׃

sf_hebmodern@Genesis:1:2 @ והארץ היתה תהו ובהו וחשך על פני תהום ורוח אלהים מרחפת על פני המים׃

sf_hebmodern@Genesis:1:3 @ ויאמר אלהים יהי אור ויהי אור׃

sf_hebmodern@Genesis:1:4 @ וירא אלהים את האור כי טוב ויבדל אלהים בין האור ובין החשך׃

sf_hebmodern@Genesis:1:5 @ ויקרא אלהים לאור יום ולחשך קרא לילה ויהי ערב ויהי בקר יום אחד׃

sf_hebmodern@Genesis:1:6 @ ויאמר אלהים יהי רקיע בתוך המים ויהי מבדיל בין מים למים׃

sf_hebmodern@Genesis:1:7 @ ויעש אלהים את הרקיע ויבדל בין המים אשר מתחת לרקיע ובין המים אשר מעל לרקיע ויהי כן׃

sf_hebmodern@Genesis:1:8 @ ויקרא אלהים לרקיע שמים ויהי ערב ויהי בקר יום שני׃

sf_hebmodern@Genesis:1:9 @ ויאמר אלהים יקוו המים מתחת השמים אל מקום אחד ותראה היבשה ויהי כן׃

sf_hebmodern@Genesis:1:10 @ ויקרא אלהים ליבשה ארץ ולמקוה המים קרא ימים וירא אלהים כי טוב׃

sf_hebmodern@Genesis:1:11 @ ויאמר אלהים תדשא הארץ דשא עשב מזריע זרע עץ פרי עשה פרי למינו אשר זרעו בו על הארץ ויהי כן׃

sf_hebmodern@Genesis:1:12 @ ותוצא הארץ דשא עשב מזריע זרע למינהו ועץ עשה פרי אשר זרעו בו למינהו וירא אלהים כי טוב׃

sf_hebmodern@Genesis:1:13 @ ויהי ערב ויהי בקר יום שלישי׃

sf_hebmodern@Genesis:1:14 @ ויאמר אלהים יהי מארת ברקיע השמים להבדיל בין היום ובין הלילה והיו לאתת ולמועדים ולימים ושנים׃

sf_hebmodern@Genesis:1:15 @ והיו למאורת ברקיע השמים להאיר על הארץ ויהי כן׃

sf_hebmodern@Genesis:1:16 @ ויעש אלהים את שני המארת הגדלים את המאור הגדל לממשלת היום ואת המאור הקטן לממשלת הלילה ואת הכוכבים׃

sf_hebmodern@Genesis:1:17 @ ויתן אתם אלהים ברקיע השמים להאיר על הארץ׃

sf_hebmodern@Genesis:1:18 @ ולמשל ביום ובלילה ולהבדיל בין האור ובין החשך וירא אלהים כי טוב׃

sf_hebmodern@Genesis:1:19 @ ויהי ערב ויהי בקר יום רביעי׃

sf_hebmodern@Genesis:1:20 @ ויאמר אלהים ישרצו המים שרץ נפש חיה ועוף יעופף על הארץ על פני רקיע השמים׃

sf_hebmodern@Genesis:1:21 @ ויברא אלהים את התנינם הגדלים ואת כל נפש החיה הרמשת אשר שרצו המים למינהם ואת כל עוף כנף למינהו וירא אלהים כי טוב׃

sf_hebmodern@Genesis:1:22 @ ויברך אתם אלהים לאמר פרו ורבו ומלאו את המים בימים והעוף ירב בארץ׃

sf_hebmodern@Genesis:1:23 @ ויהי ערב ויהי בקר יום חמישי׃

sf_hebmodern@Genesis:1:24 @ ויאמר אלהים תוצא הארץ נפש חיה למינה בהמה ורמש וחיתו ארץ למינה ויהי כן׃

sf_hebmodern@Genesis:1:25 @ ויעש אלהים את חית הארץ למינה ואת הבהמה למינה ואת כל רמש האדמה למינהו וירא אלהים כי טוב׃

sf_hebmodern@Genesis:1:26 @ ויאמר אלהים נעשה אדם בצלמנו כדמותנו וירדו בדגת הים ובעוף השמים ובבהמה ובכל הארץ ובכל הרמש הרמש על הארץ׃

sf_hebmodern@Genesis:1:27 @ ויברא אלהים את האדם בצלמו בצלם אלהים ברא אתו זכר ונקבה ברא אתם׃

sf_hebmodern@Genesis:1:28 @ ויברך אתם אלהים ויאמר להם אלהים פרו ורבו ומלאו את הארץ וכבשה ורדו בדגת הים ובעוף השמים ובכל חיה הרמשת על הארץ׃

sf_hebmodern@Genesis:1:29 @ ויאמר אלהים הנה נתתי לכם את כל עשב זרע זרע אשר על פני כל הארץ ואת כל העץ אשר בו פרי עץ זרע זרע לכם יהיה לאכלה׃

sf_hebmodern@Genesis:1:30 @ ולכל חית הארץ ולכל עוף השמים ולכל רומש על הארץ אשר בו נפש חיה את כל ירק עשב לאכלה ויהי כן׃

sf_hebmodern@Genesis:1:31 @ וירא אלהים את כל אשר עשה והנה טוב מאד ויהי ערב ויהי בקר יום הששי׃